આજ રોજ સુરત મહાનગર પાલિકાની સામાન્ય સભામાં AAP ના કોર્પોરેટર મહેશ અણઘણે શહેરની હાલની દયનીય પરિસ્થિતિ અંગે 30 વર્ષના ભાજપ શાસન બાદનું સ્પષ્ટ અને કર્કશ ચિત્ર રજૂ કર્યું.

મહેશ અણઘણે સભામાં જણાવ્યું કે ભાજપ શાસકો સુરતને ડાયમંડ સિટી, ટેક્સટાઇલ હબ અને સ્માર્ટ સિટી તરીકે ગૌરવથી રજૂ કરે છે, પરંતુ સામાન્ય જનતાનું રોજિંદું જીવન તો એક જ શબ્દમાં “ત્રાહીમામ” બની ગયું છે. “30 વર્ષમાં દેશો વિકસિત થઈ જાય છે, પણ સુરતમાં રસ્તાઓ પરનું દબાણ, ટ્રાફિક જામ અને અવ્યવસ્થાનું રૂપ વધુ ભયાનક બન્યું છે. જો આ ભાજપની નિષ્ફળતા નથી, તો શું છે? આ તો તમારી બેદરકારી અને અસમર્થતાનો પુરાવો છે,” તેમ તેમણે ભારપૂર્વક જણાવ્યું.

30 વર્ષના ભાજપ શાસનમાં જનતાને શું મળ્યું?

મહેશ અણઘણે શહેરની હકીકત સામે મૂક્તપણે આંગળી ઉઠાવી:

ફ્લાયઓવર નીચે ટપકતું પાણી અને અસહ્ય દુર્ગંધ

લગભગ દરેક રોડ પર ગેરકાયદેસર દબાણો

અશુદ્ધ ખોરાકનું વેચાણ

માટીથી ભરેલા ડમ્પરોની ધુળ અને પ્રદૂષણ

દરેક માર્ગ પર લાંબા ટ્રાફિક જામ — સવારે ઓફિસ જવું હોય કે સાંજે ઘરે ફરવું, બંને મુશ્કેલ

ફ્લાયઓવર હોવા છતાં નીચેના માર્ગો પર અરાજકતા યથાવત

ફૂટપાથો હોકર્સ, દુકાનોના વિસ્તારો અને ગંદકીના ઢગલાઓના કબજા હેઠળ

ચૂંટણી પહેલાં દબાણ હટાવવાની નાટકબાજી અને પછી પાછું એ જ હાલત

ખરબोंના ખર્ચે બનેલી BRTS છતાં બસોમાં ભીડ, રસ્તાઓ પર ખાડા અને ટ્રાફિકની સમસ્યા

વસ્તી ત્રણ ગણી અને વાહનો દસ ગણા થયા, પરંતુ રસ્તાઓની વ્યવસ્થા હજુ 1990 જેવી

“અમારા ટેક્સના પૈસા ક્યાં જાય છે?”

મહેશ અણઘણે સવાલ ઉઠાવ્યો કે નાગરિકો ટેક્સ, GST અને પ્રોપર્ટી ટેક્સ ચૂકવે છે, પરંતુ તેનો ઉપયોગ ક્યાં થાય છે?

“ચમકદાર ઇવેન્ટો, જાહેરાતો અથવા અધિકારીઓ અને ભાજપના જેબમાં? ચૂંટણી પહેલાં જ નવા પ્રોજેક્ટની જાહેરાત અને પછી તેને અડધામાં છોડી દેવી — આ રાજનીતિ નહીં તો શું?” તેમ તેમણે તીખી ટકોર કરી.

“જનતા કંટાળી ગઈ છે; વાસ્તવિક વિકાસ જોઈએ”

તેમણે જણાવ્યું કે સુરતીઓને હવે ખાલી વચનો નહીં, પરંતુ તાત્કાલિક કામ જોઈએ.

સ્માર્ટ સિટીના લેબલ કરતાં વાસ્તવિક અને ધરાતળ પર ઉતરતા વિકાસની માંગ વધી રહી છે.

AAP કોર્પોરેટર મહેશ અણઘણની મુખ્ય માંગણીઓ

તમામ મુખ્ય માર્ગોમાંથી ગેરકાયદેસર દબાણો કાયમી રીતે દૂર કરો

ટ્રાફિક સિસ્ટમમાં સુધારા — સિગ્નલ સિંક્રોનાઇઝેશન

જાહેર પરિવહનને વધુ અસરકારક બનાવવું

અવ્યવસ્થાના જવાબદાર અધિકારીઓ અને કોન્ટ્રાક્ટરો સામે તાત્કાલિક કાર્યવાહી — તપાસ, સસ્પેન્શન કે જેલ સુધીની કાર્યવાહી

અંતમાં મહેશભાઈએ ચેતવણી આપી:

“જો ફરી માત્ર વચનો જ મળશે અને કામ નહીં થાય, તો અમે રસ્તા પર ઉતરશું. 30 વર્ષની નિષ્ફળતા હવે વધુ સહન કરાશે નહીં.”