સુરત મહાનગરપાલિકાની હદમાં આવેલા વોર્ડ ૧૭માં નાગરિકોને વધુ સુવિધાજનક અને ગુણવત્તાયુક્ત માર્ગ સુલભ બને તે માટે મહત્વપૂર્ણ પગલું ભરવામાં આવ્યું છે. વોર્ડ ૧૭ના કોર્પોરેટર એડવોકેટ સ્વાતી ક્યાડા દ્વારા પોતાના મત વિસ્તારમાં સારા અને મજબૂત રોડની જરૂરિયાત અંગે કરાયેલી રજૂઆતને ધ્યાનમાં લઈ સિલ્વર ચોકથી સાવલિયા સર્કલ સુધી સુંદર એસી.સી (એમ-૪૦ ગુણવત્તાવાળો) રોડ જનહિતાર્થે બનાવવામાં આવ્યો છે.
આ નવા રોડના નિર્માણથી સ્થાનિક નાગરિકો, વાહનચાલકો તથા વ્યાવસાયિકોને મોટી રાહત મળશે. અગાઉ રોડની ખરાબ હાલતને કારણે ટ્રાફિક સમસ્યા અને અકસ્માતની શક્યતાઓ વધતી હતી, પરંતુ હવે મજબૂત અને સમતલ એસી.સી રોડ બનતા અવરજવર વધુ સુરક્ષિત અને સુગમ બની છે.
આ પ્રસંગે એડવોકેટ સ્વાતી ક્યાડાએ જણાવ્યું હતું કે, “અમારા મત વિસ્તારના લોકો ને સરસ રોડ મળે તે માટે રજૂઆત કરવામાં આવી હતી. તે રજૂઆતને ધ્યાને લઈ સિલ્વર ચોક થી સાવલિયા સર્કલ સુધી સુંદર એસી.સી રોડ જનહિતાર્થે બનાવવામાં આવ્યો છે. મારા વોર્ડ વિસ્તારના નાગરિકો ને ખૂબ ખૂબ અભિનંદન.”
નાગરિકોએ પણ સુરત મહાનગરપાલિકા તથા વોર્ડના પ્રતિનિધિનો આભાર વ્યક્ત કર્યો છે અને જણાવ્યું છે કે આવા વિકાસકાર્યોથી વિસ્તારની કુલ સુવિધાઓમાં વધારો થશે તેમજ ભવિષ્યમાં ટ્રાફિકની સમસ્યાઓમાં ઘટાડો થશે.
